Protesta në Spanjë kundër masave të izolimit
Mijëra persona kanë protestuar të shtunën në Spanjë, kundër menaxhimit të koronavirusit nga ana e qeverisë.
Partia e të djathtës ekstreme, Vox u ka bërë thirrje mbështetësve që të vozitin makinat nëpër qytetet më të mëdha spanjolle, në mënyrë që të grumbullohen, por duke mbajtur distancën fizike.
Protestuesit në kryeqytetin Madrid kanë mbajtur flamuj spanjollë nëpër duar, teksa i kanë bërë thirrje kryeministrit socialist, Pedro Sanchez që të japë dorëheqje.
Spanja ka aplikuar disa prej masave më të ashpra në Evropë, me qëllim të luftimit të koronavirusit.
Në javët e fundit ka lehtësuar disa prej tyre, mirëpo Madridi dhe Barcelona kanë vazhduar të jenë në izolim për shkak të numrit të madh të rasteve të prekura me koronavirus.
Mirëpo të dyja këto qytete do të lehtësojnë disa masa nga dita e hënë duke mundësuar grumbullimin e jo më shumë se 10 personave.
Prej marrjes së masave të para në fillim të muajit mars, janë mbyllur shumica e bizneseve, që ka çuar në parashikime për tkurrje të ekonomisë për 12 për qind këtë vit në territorin spanjoll.
Spanja, një nga vendet që pësoi mjaftë shumë nga koronavirusi, ka nisur megjithatë të zbusë pak masat.
Ekipet e La Liga janë kthyer në stërvitje, kurse sipas premtimeve kryeministrit të Spanjës Pedro Sanchez pritet që kampionati në futboll, La Liga të vazhdojë nga data 8 qershor.
