Ende nuk mund t’i tërhiqni 10% të Trustit

Pas propozimit të Qeverisë së Kosovës që 10 për qind e kursimeve të qytetarëve mund të tërhiqen për të kthyer fuqinë blerëse në vend, qytetarë të shumtë ia kanë mësyrë Trustit Pensional, duke menduar se mund t’i tërheqin këto kursime.

Por, në fakt, Qeveria vetëm ka propozuar dhe nuk ka marrë ndonjë vendim.

Për këtë çështje, Fondi i Kursimeve Pensionale-Trust, ka dalë me një sqarim.

Përmes një njoftimi në Facebook, ky Fond ka bërë të ditur se ende nuk ka ndonjë vendim përfundimtar për tërheqjen e këtyre mjeteve, ashtu siç ishte paraparë nga Qeveria e Kosovës në njërën nga nëntë masat e Pakos së Rimëkëmbjes Ekonomike.

“Të nderuar kontribuues, këto ditë kemi një fluks të madh të mesazheve dhe vizitave për çështjen e 10%-shit, që është deklaruar nga Qeveria e Kosovës se do t’ju lejohet kontribuuesve t’i tërheqin nga Trusti. Ju njoftojmë se nuk ka ende asnjë vendim përfundimtar për tërheqjen e 10%-shit, andaj nuk ka mundësi askush ende t’i tërheq mjetet nga Trusti. Ne do t’ju njoftojmë me kohë për çdo ndryshim”, thuhet në njoftim.

Fondi ka kërkuar nga kontribuuesit që t’i shmangin vizitat në zyrat e tyre, duke shtuar se ditëve të fundit ka pasur fluks të madh.

“Ju lutemi, po ashtu, të shmangni vizitat në zyrat tona për çështjen e 10%-shit, pasi kështu po vështirësohet tejet shumë shërbimi i kontribuuesve, kjo për shkak të kufizimeve që janë në fuqi nga pandemia e COVID-19”, thuhet në njoftim.