Qeveria u kërkon institucioneve publike e private të reduktojnë stafin

Rritja e numrit të rasteve me Covid-19 ka shtyrë Qeverinë e Kosovës që t’i obligojë institucionet private dhe publike që të organizojnë në distancë punën me stafin dhe bartjen e maskave si pjesë e luftës për parandalimin e coronavirusit. Aktualisht Kosova po përballet me paraqitjen e numrit më të lartë të rasteve të reja me koronavirus që nga shpërthimi i pandemisë në muajin mars.

Në mbledhjen e sotme të qeverisë, me kërkesë të Ministrisë së Shëndetësisë është përkrahur vendimi që të gjitha institucionet publike dhe private të organizojnë punën me stafin e tyre duke respektuar distancën ose online nga shtëpitë e tyre.

“Rritja e numrit të të infektuarve me Covid-19 është shqetësuese. Mungesa e vëmendjes për parandalim të përhapjes së virusit po vë në rrezik jetët e shumë qytetarëve me ndjeshmëri të lartë, sidomos të gjyshërve e gjysheve tona”, tha kryeministri Avdullah Hoti.

Ai prezantoi më pas këto masa:

-Obligohen institucionet publike dhe private që të organizojnë punën në distancë apo nga shtëpitë

-Të reduktohet stafi

-Të shtohen kontrollet nga inspektoratet

-Të gjitha institucionet obligohen të shtojnë kontrollet në hyrje të çdo institucioni

-Maskat janë obligative gjatë gjithë kohës në hapësira publike

-Puna në institucione duhet të organizohet në përputhje me Manualin e Ministrisë së Shëndetësisë

Kurse, ministri i Shëndetësisë, Armend Zemaj tha se kjo bëhet me rekomandim të IKShP-së, ku shtoi se të gjithë institucionet publike e private obligohen të shtojnë kontrollet rigoroze për bartje të maskave.

“Me qëllim të parandalimit të përhapjes IKSHPK na ka rekomanduar neve si Ministri e Shëndetësisë, të përkrahim vendimin që të gjitha institucionet publike e private obligohen të organizojnë punën me stafin e tyre në distancë fizike apo nga shtëpitë, online, që nënkupton të reduktohet stafi. Të gjitha institucionet publike dhe private të shtojnë kontrollet rigoroze të bartjes së maskave”, tha Zemaj.