Si u shndërrua Pallati i Brigadave brenda një nate

Kur mendojmë për një event chic dhe modern, dekori i të cilit është frymëzuar nga pamjet piktoreske të natyrës dhe tradita e vendeve shqiptare, duket sikur dy gjëra kundërshtojnë njëra-tjetrën. Por ja që dekori i Gaia Event tërhoqi vëmendjen e të gjithëve në “Oda”, organizuar për të tretin vit radhazi me mbështetjen e ministrisë së Turizmit dhe Mjedisit.

Nën tingujt e muzikës shqiptare dhe në shoqërinë e emrave të njohur të artit, kulturës, medias, politikës dhe biznesit dhe një delegacioni të huaj, “Oda” festoi dhe promovoi sërish vlerat e kombit, gjë që sigurisht vihej re në gjithë konceptimin e dekorit që shndërroi Pallatin e Brigadave në një copëz natyre.

Gaia Event, që konceptoi dhe kuroi gjithë organizimin e “Odës”, u frymëzua nga tradita shqiptare duke e transmetuar atë te të gjitha detajet; në motive, ngjyra, lule dhe kombinime nuancash.

“Interpretimi që vendosëm t’i jepnin ‘Oda’ ishte ai i natyrës piktoreske dhe Bjeshkëve,” shkruan kompania në Instagram.

Si një event ku vlerësohen personalitete të njohura të vendit, me famë kombëtare dhe ndërkombëtare, sigurisht që në qendër të dekorit të Gaia Events qëndron stili chic. Megjithatë nisur nga qëllimi kryesor i “Oda”, që ka të bëjë me promovimin e vlerave shqiptare, ndjeshëm vihet re stili rustic.

Rustic solli pamjen e freskët të natyrës shqiptare në Bjeshkë. Organizatorët i besuan fort ngjyrave dhe elementeve të tokës; nuk munguan detajet e drurit, motivet tradicionale, gjethet dhe teksturat e tjera të natyrës.

Siç mund ta shihni, ngjyra që dominoi në dekor është e bardha e akullt, e cila vjen si frymëzim nga Alpet shqiptare dhe ndërthuret me të gjelbërtën e tufave të kamomilit për të krijuar në eventin “Oda” një tablo sa më të qartë të natyrës së “egër” veriore.

Nuk është hera e parë që Gaia Event, një kompani që merret jo vetëm me zbatimin dhe konkretizimin e idesë së dekorit, por edhe me konceptimin, i drejtohet identitetit shqiptar si frymëzim. Nëse i hedhim një sy Instagram-it të Gaia, vëmë re se nuk mungon frymëzimi nga natyra piktoreske, tradita e hershme dhe motivet shqiptare, të cilat ndërthuren me elementët modernë.

Gaia Event ka sjellë një koncept ndryshe dhe një stil të veçantë, që përshtatet te të gjitha llojet e eventeve, duke filluar nga festat private, si ajo e Luana Vjollcës, e deri te evente si “Oda”.