Monday, January 24, 2022

SHBA dhe BE i dalin në mbështetje Osmanit pas kërcënimeve nga deputeti i LDK-së

Ambasada amerikane në Prishtinë dhe Shefja e Zyrës së Bashkimit Evropian në Kosovë, Nataliya Apostolova kanë reaguar pas tensioneve dhe përplasjes në seancën e fundit të Kuvendit, e cila u ndërpre për shkak të kushteve të rënda që u krijuan.

Ambasada e SHBA-së thotë se legjislativi kosovar po humbë kohë me sulme personale në vend se të kryej punën e tij.

“Dy muaj më parë ne u bëmë thirrje të gjitha palëve të ulin retorikën e politizuar dhe të bashkohen për të zgjidhur krizat ekonomike dhe shëndetësore. Kuvendi ka humbur kohë në shpërqendrime dhe sulme personale në vend që të kryejë përgjegjësitë e tij. Populli i Kosovës meriton më mirë”, thuhet në reagim.

Kurse shefja e Zyrës së BE-së thotë se të gjithë duhet të përmbahen nga dhuna në Kuvend e sidomos ndaj një gruaje.

“Të gjithë duhet të angazhohen për një konsensus politik dhe të përmbahen nga dhuna e cila nuk ka vend në shoqëritë demokratike, e lëre më në Shtëpinë e Popullit, veçanërisht ndaj një gruaje-kryetare e Kuvendit”, ka shkruar Apostolova.

Sjelljen e deputetit Ukaj e kanë dënuar edhe deputetet Eliza Hoxha, Fitore Pacolli e Ganimete Musliu. Por kundër Osmanit ka dalë deputetja e PDK-së, Evgjeni Thaçi e cila ka thënë se kryetarja e Kuvendit me qëllim po krijon situata të pakëndshme në sallën e Parlamentit.

LEXO EDHE KËTË:

- Advertisment -

Lexoni