Wednesday, June 29, 2022

Raka: Me numrat e fundit për COVID-19 jemi të parët në Evropë

Mikrobiologu Lul Raka thotë se në Kosovë aktualisht situata me Covid-19 është alarmante. Tha se në tre javët e fundit, numri i rasteve të reja me koronavirus në Kosovë është më e madhja në Europë.

“Me numrat e ditëve të fundit në 100 mijë banorë ne jemi të parët në Europë në tre javët e fundit”, tha Raka.
Në këtë mënyrë ai thotë se situata është e rënduar.

“Situata është shqetësuese dhe alarmante njëkohësisht. Me këtë trend, me këto numra situata është edhe shqetësuese edhe alarmante”, shtoi ai.

“Sot s’kemi kohë për akuza dhe kundër-akuza. S’kemi kohë me sulmi njëri tjetrin. Ne duhet me sulmu armikun e përbashkët e që është virusi, virusi është armik i përbashkët”, tha Raka.

Ai ka përmendur edhe dy faktorët kryesor, që sipas tij, ndikuan në rritjen e numrit të rasteve të reja.

“100 faktorë janë por janë 2 faktorë kryesor. Dy faktorët e rritjes së numrit të rasteve janë mos respektimi i masave të thjeshta parandaluese, maska, distanca dhe higjena personale nga qytetarët dhe mungesa e kontrollit rigoroz nga shteti”, tha Raka.

“Parandalimi është çelës pasi ilaç s’ka dhe vaksinë s’ka. Me këtë trend po shkojmë kah Italia”, tha Raka.

Trendi i lartë i të infektuarve me Covid-19 në Kosovë po vazhdon. Sot Instituti Kombëtar i Shëndetësisë Publike ka konfirmuar edhe 239 raste të reja të infektuar me Covid-19 nga gjithsej 401 mostra të testuara.

Numri total i rasteve pozitive është 7.652 raste nga 35.121 persona të dyshimtë në virusin SARS-CoV-2, me gjithsej 192 raste të vdekjes të cilët kanë pasur sëmundje të tjera shoqëruese.

Gjatë 24 orëve të fundit, janë shëruar 102 pacientë derisa numri i përgjithshëm i të shëruarve deri më sot është gjithsej 4.129 raste, kurse numri i rasteve aktive është 3.331.

- Advertisment -

Lexoni