Trump nuk lëviz nga Shtëpia e Bardhë

E ndërsa ditët kalojnë, Presidenti Donald Trump nuk e pranon humbjen e zgjedhjeve, por vijon që të insistojë në betejën ligjore duke shpresuar te mandati i dytë, që është i pamundur.

CNN ka bërë një analizë të lëvizjeve të fundit të presidentit amerikan, që është izoluar në Shtëpinë e Bardhë. Daljet në media kanë qenë të pakta, ndërsa edhe planet e tërheqjes së trupave që ai kishte kërkuar për Afganistanin dhe Irakun u njoftuan sot nga shefi i ri i Pentagonit.

I fortifikuar brenda ndërtesës së Shtëpisë së Bardhë, ku nga dritarja shikon përgatitjet për ceremoninë inauguruese të Joe Biden, ai pritet që të anulojë edhe disa aktivitete të planifikuara në ditët në vijim.

Ndërkohë që CBS News, shkruan se Presidenti Trump po e konsideron seriozisht mundësinë për të kandiduar në zgjedhjet e vitit 2024. Një gjë të tillë ai e ka diskutuar me këshilltarët e tij ditët e fundit, tha një zyrtar i lartë i fushatës së Trump.

 SHBA tërheq trupat nga Afganistani dhe Iraku para se Biden të marrë detyrën

Tani është zyrtare. Sekretari i Përkohshëm i Mbrojtjes Christopher Miller njoftoi të martën se SHBA do të tërheqë mijëra trupa të tjerë amerikanë nga Afganistani dhe Iraku deri në 15 janar 2021, pak ditë para se Presidenti i zgjedhur Joe Biden të marrë detyrën, duke konfirmuar atë që u raportua një ditë më parë. Aktualisht ka 4500 trupa amerikane në Afganistan dhe 3000 në Irak, por Miller tha se në të dy vendet nuk do të jenë më shumë se 2500 ushtarë.

Këshilltari i sigurisë kombëtare Robert O’Brien tha se pjesa tjetër që do të qëndrojnë në dy vendet e lindjes do të mbrojnë misionet dhe aleatët. “Ata trupa do të mbrojnë ambasadat tona dhe agjencitë e tjera të qeverisë amerikane duke bërë një punë të rëndësishme në ato vende.

Ata do të mbrojnë diplomatët tanë dhe ata do të parandalojnë armiqtë tanë“tha O’Brien. “Deri në maj, shpresa e Presidentit Trump është që të gjithë do të vijnë në shtëpi të sigurt” shtoi ai, megjithëse në atë kohë, vendimet do të merren nga Biden.

Një zyrtar i lartë i mbrojtjes tha se njoftimi i së martës është “në përputhje” me atë që Trump njoftoi publikisht në fillim të këtij viti dhe është “në përputhje me premtimin e tij për Popullin Amerikan”. Por NATO ka dalë kundër. Sekretari i Përgjithshëm Jens Stoltenberg u shpreh sot se blloku ushtarak mund të paguante një çmim të lartë nëse largon shumë herët trupat nga Afganistani