Krasniqi: Pas festave të fundvitit, rikthehen shërbimet në ambulancat specialistike në QKUK
Sistemi shëndetësor në Kosovë është ballafaquar me kërkesa të mëdha si pasojë e pandemisë, kështu ka thënë në një intervistë për Ekonomia Online, drejtori i Shërbimit Spitalor dhe Klinik Universitar i Kosovës, Valbon Krasniqi.
Ai tha se gjatë nëntorit kanë pasur numrin më të madh të pacientëve me 1, 010 të cilët kanë marrë shërbime spitalore.
Krasniqi theksoi se në javën e parë të vitit të ardhshëm rikthehen edhe shërbimet në ambulancat specialistike në klinikat e QKUK-së, ku pesë prej tyre janë shndërruar në klinika Covid-19.
“Sistemi jonë shëndetësor në Kosovë është ballafaquar me kërkesa të mëdha si pasojë e pandemisë Covid-19. Gjatë kohës së pandemisë ne kemi prioritizuar shërbimet shëndetësor sepse është dashur tu ofrojmë shërbime pacientëve që vinin për tu spitalizuar të sëmurë nga Covid-19. Ne kemi pasur numrin më të madh të pacientëve në fund të nëntorit dhe gjatë këtyre tri javëve deri në 1 010 pacientë kanë qenë të shtrirë të cilët kanë marrë shërbime”.
“Tash ne kemi bërë planin që menjëherë pas festave të fundvitit t’i rikthejmë edhe shërbimet në ambulancat specialistike në klinikat e QKUK-së. Pesë klinika janë shndërruar në klinika Covid-19. Klinika e Infektivës, e Pulmologjisë, Internistike, objekti i Mjekësisë Sportive si dhe Mjekimi Intensiv Qendror. Edhe në Klinikën e Pediatrisë dhe Gjinekologjisë e kemi nga një repart të destinuar për të prekurit me Covid-19”.
Krasniqi thotë se këtë kohë janë ballafaquar me kërkesë enorme të barnave.
“Gjendja me furnizim me barna në nivel të ShSKUK-së vite me radhë ka pasur mungesa të herëpashershme. Gjatë kësaj kohe jemi ballafaquar me kërkesa enorme për disa barna të caktuara. Megjithatë shumica e barnave të cilat janë në udhërrëfyesin e protokollit klinik për trajtimin e pacientëve me Covid kanë qenë në disponueshmëri, mirëpo ka pasur mungesa prej barnave të cilat janë mbështetëse”, tha ai.
