Deputetet e PDK-së thonë se po i kërcënon burri i Presidentes Osmani

Dy deputete të PDK-së, Floretë Zjenullahu dhe Ganimete Musliu kanë deklaruar në Kuvendin e Kosovës se po kërcënohen nga Prindon Sadriu, burri i Presidentes Vjosa Osmani.

“Të nderuar para jush dua të paraqes kërcënimin që kam marr nga bashkëshorti i zonjës Osmani, Prindon Sadriu. I rrethuar me pushtetin e bashkëshortes dhe partnerit të saj qeverisës, Albin Kurti ai ka marrë guximin të kërcënoj deputetët e Kuvendit, pas publikimit të fakteve ndaj tij dhe jetës luksoze që ai dhe bashkëshortja e tij bëjnë”, ka thënë Zjenullahu.

Ajo ka shtuar se këto fakte duket se i kanë prishur rehatin familjes presidenciale.

“Ai ndoshta ka menduar se përmes kësaj letre kërcënuese unë mund të frikësohem dhe të heshti, por nga këtu i bëjë me dije se ka gabuar adresën e personit dhe adresën politike që kemi menduar se mund ta frikësoni e shantazhoni”, ka thënë Zejnullahu.

Deputetja ka shtuar se ajo dhe partia e saj PDK, do të vazhdojmë të denoncojë çdo zhvatje të buxhetit të Kosovës

“I bëjë me dije bashkëshortit të zonjës Osmani se do ta padis në organet e drejtësisë për kërcënimin që më ka bërë menjëherë pas kësaj seance”, tha Zejnullahu

Jo vetëm Zejnullahu, por edhe Ganimete Musliu tha se po ndihet e kërcënuar nga burri i Presidentes.

Ajo tha se para disa ditësh në postën e Kuvendit të Kosovës i ka ardhur një zarf nga presidentja e Kosovës, Vjosa Osmani, por që, sipas saj, ai ishte dërguar nga bashkëshorti i saj Prindon Sadriu.

Ajo thotë se përmes këtij zarfi, Sadriu e kishte kërcënuar atë me padi civile.

“Para disa ditësh në postën time, në Kuvendin e Kosovës, më kishte ardhur një zarf i teleisur bukur, jo si ato tjerat që më vijnë nga qytetarët hallexhinj, por paksa më i veçantë. Jam e obliguar të deklarohem publikisht, pasi që zarfi në fjalë ishte dërguar nga presidentja e Republikës së Kosovës. Me shumë vëmendje e hapa zarfin ku shkruante: Nga presidentja Vjosa Osmani, për Ganimete Musliun, deputete e Grupit Parlamentar të PDK-së. Në brendi të zarfit nuk ishte shkresa nga Presidentja, por ishte një letër e panënshkruar e Prindon Sadriut, bashkëshortit të Presidentes Osmani. Letra që ma kishte dërguar Prindon Sadriu, me emër të Presidentes, përmbante një kërcënim për padi civile. Unë pasna thënë se ai është ambasador me korrespodencë e ambasador e bëri bashkëshortja e tij. Kjo ishte çështja që e kishte shqetësuar Prindonin e Vjosës”, ka deklaruar ajo.

Musliu është shprehur se Sadriu në letrën e dërguar ia kishte caktuar asaj disa afate për të kërkuar falje, përndryshe nëse nuk do ta bënte këtë, do ta padiste.

“Në letrën që ma kishte dërguar më kishte caktuar afate se kur duhet t’i kërkoj falje, përndryshe nëse si respektoj afatet do më padiste sepse ia kam prishur imazhin. Unë u ndala u mundova dhe u mundova me e kuptu se çfarë është puna e këtij personi. Ky djali edhe lazdrohet duke ju dukur vetja kumedit se çfarë. Ky djalë nuk e di se ku e ka vendin e tij. Ky është ambasador me korrespodencë, edhe ushtarë me korrespodencë, por krejt benificionet i merr si i rregull”, ka shtuar ajo.

Musliu ka thënë tutje se presidentja nuk duhet t’i shërbej familjes së saj.

“Vjosë e nderuar, presidenca nuk është për të shërbyer ty dhe familjes tënde. Me që burri juaj më kërcënon me padi civile, në çfarë cilësie ma dërguat letrën e tij ju si presidente, çfarë është ai fëmijë që ti t’i dërgosh letra”, ka shtuar ajo.

Përndryshe, para Musliut edhe deputetja e PDK-së, Floretë Zejnullahu ka thënë se burri i presidentes së Kosovës, Vjosa Osmanit, e ka kërcënuar.

Zejnullahu ka thënë se edhe ajo ka marrë një letër kërcënuese nga Sadriu derisa ka paralajmëruar padi ndaj tij.