Lajme në pak minuta: Çfarë po ndodh në botë

Përhapja e lisë së majmunëve mund të jetë thjesht “maja e ajsbergut”, paralajmëron OBSH

Organizata Botërore e Shëndetësisë ka paralajmëruar se 200 raste të lisë së majmunëve të gjetura javët e fundit jashtë vendeve ku virusi qarkullon zakonisht mund të jenë vetëm fillimi.

“Ne nuk e dimë nëse po shohim vetëm kulmin e ajsbergut [ose] nëse ka shumë raste të tjera që janë të pazbuluara në komunitete,” pranoi Sylvie Briand, shefja e përgatitjes dhe parandalimit për epideminë dhe pandeminë.

Burri ndërron jetë nga ataku në zemër pasi gruaja u vra nga sulmi me armë në shkollën e Teksasit

Foto: AP Photo/Jae C. Hong

Një familje në Teksas është përballur me një tragjedi të dyfishtë këtë javë pasi sulmi me armë në një shkollë fillore në Uvalde i mori jetën si mësueses Irma Garcia dhe, dy ditë më vonë, bashkëshortit të saj.

Irma, 49 vjeç, ishte një nga 21 personat e vrarë të martën nga një person i armatosur 18-vjeçar, i cili hyri në klasën e saj në shkollën Robb Elementary School dhe hapi zjarr mbi fëmijët që ishin brenda. Vetëm dy ditë më vonë, burri i saj prej 24 vitesh vdiq në shtëpi nga një atak në zemër, tha një anëtar i familjes. Joe Garcia, 50 vjeç, vendosi lule në memorialin e gruas së ndjerë të enjten në mëngjes në Uvalde dhe më pas u kthye në shtëpi, ku  u rrëzua dhe vdiq, tha nipi John Martinez për New York Times.

Policia e Teksasit mori “vendim të gabuar” duke pritur jashtë klasës, thotë zyrtari

Kreu i departamentit të sigurisë publike në Teksas pranoi të premten pasdite se “natyrisht ishte vendim i gabuar” që policia e armatosur të priste për një periudhë të gjatë jashtë klasës ku personi i armatosur në shkollë po vriste fëmijët dhe mësuesit.

Të dhënat tregojnë se kaluan rreth 78 minuta nga koha kur i armatosuri hyri në ndërtesë deri kur oficerët hynë në klasën ku ndodhej. Steven McCraw, drejtori i departamentit të sigurisë publike, i përlotur tha në një konferencë për shtyp se “nuk ka asnjë justifikim” për dështimin e personelit të trajnuar që të mos kishte ndërhyrë më herët.

Biden thotë se Putini po përpiqet të “fshijë” kulturën ukrainase

Foto: AP

Joe Biden ka akuzuar Vladimir Putinin se po përpiqet të “fshijë” kulturën e Ukrainës, por sugjeroi se plani kishte dështuar të paktën pjesërisht duke nxitur zgjerimin e NATO-s në Europë.

“Jo vetëm që po përpiqet të pushtojë Ukrainën, por fjalë për fjalë po përpiqet të fshijë kulturën dhe identitetin e popullit ukrainas. Sulmimi i shkollave, çerdheve, spitaleve, muzeve, pa asnjë qëllim tjetër veçse të eliminojë një kulturë.”

115 ushtarë të gardës kombëtare ruse u pushuan nga puna pasi refuzuan të luftonin në Ukrainë

Foto: Alexander Nemenov/AFP/Getty Images

Më shumë se 100 ushtarë të gardës kombëtare ruse u pushuan nga puna pasi refuzuan të luftojnë në Ukrainë, tregojnë dokumentet e gjykatës. Të dhënat tregojnë mospajtimin midis disa pjesëve të forcave të sigurisë përsa i përket pushtimit të Ukrainë.

Rastet e 115 ushtarëve, një forcë e njohur gjithashtu si Rosgvardia, dolën në dritë të mërkurën, pasi një gjykatë lokale ruse hodhi poshtë padinë e tyre që kundërshtoi shkarkimin.

Ukrainasit në qytetin e Zelensky-t e përshkruajnë atë si “simbol” të vendit

Foto: AP

Ukrainasit në qytetin ku u rrit presidenti Volodymyr Zelensky e kanë përshkruar atë si një “simbol” të luftës së Ukrainës kundër Rusisë. Presidenti ukrainas është bërë një fytyrë e njohur që nga fillimi i pushtimit rus mbi tre muaj më parë. Shumë ukrainas në Kryvyi Rih thanë për Euronews se ishin me fat që kishin Zelensky-n si president dhe thanë se i besonin atij për të mbrojtur vendin.