Presidenti i skuadrës arbëreshe: Synimi, ngjitja në futbollin profesionist

Piana degli Albanesi është një qytet i vogël në Sicili me mbi 6000 mijë banorë, një komunitet i njohur arbëresh në Itali. Ky komunitet, me rrënjë shqiptare ka skuadrën e tij të futbollit me president një sipërmarrës shqiptar.

Evis Troka, 40 vjeç ka mbërritur para dy dekadash në Itali dhe aktualisht, bashkë me familjarët e tij merret me biznesin e mobilimit, si dhe përpunimin e kuarcit dhe gres porcelanatit.

Sipërmarrësi nga Kuçova ndihet i lumtur për rezultatet e skuadrës së tij “San Giorgio Piana”, që po spikat edhe në moshat U-13 dhe U-19.

“Sapo kemi fituar kampionatin përkatës të kategorisë Promovuese, duke u ngjitur në Eccellenza (kategoria e fundit diletante), deklaroi Evis Troka.

Skuadra e komunitetit shqiptar ka në gjirin e saj jo vetëm arbëreshë, por edhe djem të zonave përreth. Piana degli Albanesi quhet nga vendasit Hora Arbëreshe, si pikë  referimi për të gjithë arbëreshët e Sicilisë..

Troka flet për skuadrën dhe motivet që e shtyjnë në këtë sipërmarrje sportive: “Ngjyrat e bluzës janë kuq e zi dhe stema e skuadrës nuk mund të mos ishte shqiponja me dy krerë, qe mbajmë në gjoks si mirënjohës të prejardhjes së arbëreshëve”.

Sipas djaloshit nga Kuçova, “Ngjyrat kuqezi dhe shqiponja me dy krerë që mbajmë në gjoks mbeten motivi për të cilin investoj te kjo skuadër, sepse mbi të gjitha unë jam shqiptar”.

Lexo edhe:

Evisi nuk i fsheh synimet e tij për ekipin e arbëreshëve që drejton.

“Objektivi personal është që t’i çoj sa më lart ngjyrat kuqezi, dhe pse jo në të ardhmen, me ndihmën dhe afrimin e biznesmenëve, patriotëve dhe të pasionuarve të futbollit, të jemi skuadra e vetme shqiptare që militon në futbollin profesionist Italian”.

Ai është i lumtur për rezultatet e futbollistëve shqiptarë në Itali.

“Jam krenar pasi në të ardhmen do të kemi një ekip kombëtar pjesëmarrës dhe kompetitiv edhe në kampionatet e kontinentit apo në botëror,” vijoi Evisi.

“Jam shumë optimist dhe i kënaqur me punën dhe ecurinë e kombëtares sonë. Shoh shumë cilësi dhe rivalitet në grup, çka rrit konkurrencën dhe nivelin e skuadrës tonë kombëtare”.