Lajme në pak minuta: Çfarë po ndodh në botë

Joe Biden mbështet Suedinë dhe Finlandën si anëtare të “NATO-s së ringjallur”

Foto: Chip Somodevilla/Getty Images

Presidenti i SHBA-së, Joe Biden, ka mirëpritur liderët e Finlandës dhe Suedisë në Shtëpinë e Bardhë duke premtuar mbështetje të plotë për aplikimet e tyre për anëtarësim në atë që ai e quajti një “NATO të ringjallur” pas pushtimit në Ukrainë.

Megjithatë anëtarësimi duket i vështirë për shkak të kundërshtimit të presidentit turk Recep Tayyip Erdogan. Erdogan akuzoi Suedinë dhe Finlandën se strehojnë dhe financojnë grupin militant të Partisë së Punëtorëve të Kurdistanit dhe kurdët sirian YPG, të cilët ai i konsideron si “terroristë”.

Vajza e Putinit ka shkuar në Mynih “më shumë se 50 herë” në dy vjet, zbulojnë të dhënat

Foto: Reuters

Sipas të dhënave të fluturimeve të siguruara nga media e pavarur ruse iStories dhe revista gjermane Der Spiegel, vajza më e vogël e Putinit, Katerina Tikhonova, ka udhëtuar për në Mynih në Gjermani “më shumë se 50 herë” midis 2017 dhe 2019. Ajo ka udhëtuar me avionë privatë me mbështetjen e plotë të shtetit dhe në shoqërinë e punonjësve të Putinit.

Rusia po kryen “gjenocid” ndaj ukrainasve, thotë Zelensky

Rusia po përpiqet në mënyrë të qëllimshme dhe kriminale që të vrarë sa më shumë ukrainas të jetë e mundur, tha presidenti ukrainas Volodymyr Zelensky në fjalimin e tij të fundit, ku akuzon Moskën për kryerjen e gjenocidit.

Ai tha gjithashtu se forcat ruse e kishin kthyer rajonin Donbas, ku aktualisht po përqendrojnë përpjekjet e rusëve, në “ferr” dhe tha se kishin vrarë “shumë” njerëz në rajonin Chernihiv në Ukrainën veriore. Nuk kishte asnjë “shpjegim ushtarak” për vrasjen dhe shkatërrimin, tha ai.

Numri i rasteve me Covid në Korenë e Veriut kalon 2 milionë: Rritet shqetësimi global

Foto: KCNA/EPA

Ekspertët kanë vënë në pikëpyetje pretendimin e Koresë së Veriut se po arrin “rezultate të mira” në betejën kundër Covid-19, pasi numri i njerëzve me simptoma të virusit tejkaloi 2 milionë.

Koreja e Veriut tha se të premten u raportuan 263,370 raste të reja me ato që po konsiderohen “ethe” dhe dy vdekje, duke e çuar numrin total të rasteve në 2.24 milionë, përfshirë 65 vdekje, sipas agjencisë shtetërore të lajmeve KCNA.

Agjencia raportoi se sa prej atyre rasteve kishin rezultuar pozitivë me Covid, por tha se vendi kishte “rezultate të mira” në betejën kundër virusit.

Prokurori ukrainas kërkon dënim të përjetshëm për ushtarin rus në gjyqin për krime lufte

Foto: OLEG PETRASYUK / EPA / TASS

Prokurorët ukrainas kërkuan që një ushtar rus, i cili dëshmoi se qëlloi një civil me urdhër të një oficeri, të marrë një dënim të përjetshëm. Vadim Shishimarin akuzohet se qëlloi një 62-vjeçar në kokë përmes një dritareje të hapur makine në një fshat në rajonin verilindor Sumy, më 28 shkurt, katër ditë pas pushtimit.

Shishimarin, i cili pranoi fajin për akuzat, dëshmoi të enjten se ai qëlloi një civil me urdhër të dy oficerëve dhe u lut që e veja e viktimës ta falte atë. Ushtari 21-vjeçar i tha gjykatës në Kiev se oficeri këmbënguli se ukrainasi, i cili po fliste në celular, mund të tregonte vendndodhjen e tyre tek forcat ukrainase.

Mungesë e qumështit formulë për bebet në SHBA

Foto: AP Photo/Eric Gay

Mungesa e qumështit formulë për bebet është bërë shumë seroze në Shtetet e Bashkuara, saqë furnizimet po transportohen nga Europa.

Furnizimet e qumështit formulë për bebe janë kufizuar shumë në të gjithë SHBA-në në javët e fundit pasi një tërheqje në lidhje me një çështje sigurie (u gjet një bakter që mund të shkaktojë sëmundje të rënda tek foshnjat) nga Abbott Nutrition përkeqësoi ndërprerjet e zinxhirit të furnizimit në të gjithë industrinë. Kriza ka bërë që raftet e farmacive dhe supermarketeve të boshatisen dhe prindërit po përpiqen të gjejnë zgjidhje në internet.

Biden ka autorizuar Departamentin e Mbrojtjes që të përdorë avionë komercialë për të transportuar nga jashtë qumësht formulë nga kompani që plotësojnë standardet e SHBA-së. Në fillim të kësaj jave, Administrata e Ushqimit dhe Barnave (FDA) tha se po riorganizonte procesin e rishikimit për ta bërë më të lehtë për prodhuesit e huaj që të fillonin dërgimin e qumështit formulë në SHBA.